Այս նախաձեռնությունը մեզ համար պարզապես երաժշտական նախագիծ չէ։ Այն ներդրում է կրթության, մշակույթի և երիտասարդների զարգացման մեջ։ Այն հարթակ է, որտեղ ձևավորվում են ոչ միայն պրոֆեսիոնալ երաժիշտներ, այլ նաև պատասխանատու, մտածող և ստեղծագործ անհատներ։

Նվագախումբը կամրջում է կրթական համակարգն ու պրոֆեսիոնալ երաժշտական աշխարհը՝ ստեղծելով հավասար հնարավորություններ բոլոր նրանց համար, ովքեր ընտրել են արվեստի ճանապարհը։ Միևնույն ժամանակ, այն դառնում է ոգեշնչման աղբյուր թե՛ երիտասարդների, թե՛ նրանց ընտանիքների համար։

Այսօր նվագախումբը արդեն ներկայանում է ինչպես Հայաստանի լավագույն բեմերում, այնպես էլ միջազգային հեղինակավոր հարթակներում։ Սա հստակ վկայում է, որ երբ քաղաքը հավատում է իր երիտասարդությանը և ներդրում է կատարում նրանց զարգացման մեջ, արդյունքը դառնում է տեսանելի և արժանապատիվ։

Վստահ եմ, որ Երևանի երիտասարդական նվագախումբը կդառնա մեր քաղաքի մշակութային կարևորագույն խորհրդանիշներից մեկը՝ ներկայացնելով Երևանը աշխարհին ոչ միայն որպես պատմությամբ հարուստ, այլ նաև ապագայով լի քաղաք։

Նվագախումբը մեր հավատն է երիտասարդության նկատմամբ, մեր ներդրումը՝ նրանց զարգացման մեջ, և մեր վստահությունը՝ նրանց ապագայի հանդեպ։